Béier

Och wa vill Leit Lëtzebuerg net direkt mam Béier verbannen, esou hu mir awer sou munches ze bidden.

Nieft dem traditionellen Humpen, gëtt och de Craft-Béier vu Mikrobrauereien ëmmer méi beléift.

Net nëmmen a punkto Goût a Qualitéit kënne mir mat deene Grousse mathalen. Dat wëssen och eis Noperen, net fir näischt exportéiere mir dat gëllent Gesëffs och an d’Belsch oder an Däitschland.

Mee wousst der, dass eise Béier souguer bis a China geliwwert gëtt? Ee Mini w.e.g!

Crémant

Zanter 1991 ass de Crémant déi Lëtzebuerger Äntwert op de franséische Schampes.

Grad esou wéi bei der méthode champenoise, ginn och hei vun Hand geliesen Drauwe benotzt an an der Fläsch fermentéiert. Iwwregens ass Lëtzebuerg een vun deenen eenzegen Länner ausserhalb vu Frankräich, wat d’Appellatioun Crémant benotzen däerf.

An dëser Éier gi mir méi wéi gerecht. De Lëtzebuerger Crémant iwwerzeegt ëmmer nees d’Jurye bei internationale Concoursen.

Dobäi ass och hei am Land all Occasioun gutt, fir mat Crémant unzestoussen! Prost!

Wäin

Riesling, Pinot Gris, Pinot Blanc, Chardonnay, Auxerrois, Rivaner, Elbling, Gewürztraminer a Pinot Noir – dat sinn déi Haaptdrauwenzorten, déi zu Lëtzebuerg ugebaut ginn, haaptsächlech laanscht d’Musel.

Zënter datt d’Réimer déi éischt Riewen hei am Land ugebaut hunn, huet sech eng reegelrecht Wäikultur entwéckelt, mat Degustatiounen, Wäifester an all Zorte Fester.

Et trëfft ee sech gär op der Musel, op e Pättche Wäin – oder och emol zwee!

Gromperekichelchen

En Zongebriecher fir Auslänner, mee mir loossen eis se op der Zong zergoen.

Op kenger Kiermes dierfen eis traditionell Gromperekichelcher feelen.

Ma natierlech sinn der Bomi hir déi Bescht. Nach ee Flapp Äppelkompott dobäi an se sinn nach besser. Hmmm, sou schmaacht Lëtzebuerg!

Kachkéis

Grad wéi de Spinat dem Popeye, den Zaubertrank dem Asterix, sou ass de Kachkéis dem Superjhemp säin Elixir.

Vill hunn der probéiert d’Geheimrezept erauszefannen, mee do loosse mir eis net an d’Kaarte kucken.

Déi original Kachkéise-Schmier, déi fannt dir just zu Lëtzebuerg! Wat si esou besonnesch mécht? Ma de Kéis gëtt geschmolt, an net gekacht. Am beschte schmaacht e mat enger dënner Schicht Moschtert. Lecker!

Haute Cuisine

D’Kichen zu Lëtzebuerg ass esou villfälteg, wéi seng Bevëlkerung an dobäi fënnt een hei och nach déi héchste Konzentratioun vu Michelin-Stärerestaurante pro Kapp weltwäit. A mir hunn och nach déi eenzeg weiblech Kächin, déi jeemools e Bocuse d’Or gewonnen huet. Souguer Frankräich, d’Heemecht vun der Haute Cuisine, kann do net mathalen. Op alle Fall gëtt et zu Lëtzebuerg ëmmer eng valabel Excuse fir en neie Restaurant auszeprobéieren. Gudden Appetit!

Grillwurscht

Déi Lëtzebuerger Grillwurscht gëtt aus Schwéngefleesch gemaach an ass wäitleefeg Famill mam Thüringer. Dir fannt se op all Event, Duerffest a Grillparty. Esoubal d’Sonn erauskënnt, fänkt d’Grillsaison hei am Land un, sief dat doheem oder op de Fester. Inoffizielle Schätzungen no, huet all zweete Stot ee Grill. An d’Kiischt um Kuch, dat ass de Lëtzebuerger Moschtert op der Grillwurscht. Also de Grill un a lass!

Rieslingspaschtéit

D’Rieslingspaschtéit ass eng kulinaresch Traditioun: A Rondele geschnidden, mat engem gudde Patt Riesling, dierf dës typesch Lëtzebuerger Spezialitéit op kenger Feier feelen. D’Preparatioun hëlt vill Zäit an Usproch, brauch vill Gedold an Disziplin. An dat schmaacht een och! Loosst Iech se also net entgoen a gitt bei den nächste Bäcker, do sollt sou eng gutt Schneekegkeet ze fanne sinn.

An der selwechter Kollektioun

Béier
Crémant
Gromperekichelchen
Kachkéis
Haute Cuisine
Grillwurscht